Il-Liturġija illum ma tippreżentalniex storja minn wara il-Qawmien ta’ Kristu imma tippreżentalna il-ħajja li jagħtina Kristu r-Rxoxt. “Jien ġejt biex ikollkom il-ħajja, u ħajja bil-kotra”. Il-ħajja tagħna hija esperjenza kontinwa fejn nippruvaw nifhmu x’jiġifieri il-Qawmien ta’ Kristu. Il-Qawmien huwa proċess, esperjenza li tibdilna, tbiddel l-istorja tagħna u tal-kommunita’ fejn ngħixu. 

U fil-fatt illum il-Vanġelu jitkellem fuq l-aspett tal-kommunita’ ukoll. Din is-silta tiġi wara l-esperjenza ta’ dak ir-raġel għami li wara li tfejjaq u emmen f’Ġesu’ ġie mkeċċi mis-sinagoga. Ġesu’ għalhekk jitkellem fuq il-merħla tiegħu u fuq il-mexxejja tal-merħla. U jpoġġi quddiemna ħafna kuntrasti. Hu bħala ir-Ragħaj it-Tajjeb jindokkra lin-nagħaġ tiegħu, jafhom waħda waħda. In-nagħaġ jafuh. Hu ġie għal kulħadd u ma jkeċċi lil ħadd ‘il barra. Hu ġie biex jagħti ħajtu u ġie biex jagħti l-ħajja. Jmexxihom fejn jistgħu jirgħu b’ħafna liberta’: ‘jidħol u joħroġ u jsib fejn jirgħa’. Minn naħa l-oħra l-Ispirtu il-Ħażin jgħawweġ l-affarijiet u jġib il-biża’. Naraw dan fil-kliem ‘joqtol, jisraq, jeqred’. Dawn kollha sinjali ta’ mewt u mhux Qawmien. 

F’din is-silta Ġesu’ jgħid li huwa l-bieb tal-maqjel. Bieb jfakkarna li qiegħed hemm biex jipproteġina u jagħtina il-kenn u s-sigurta’. Ir-Rgħajja, meta kienu jkunu qed jirgħu u jkunu l-bogħod wisq mill-maqjel kienu jiffurmaw ċirku minn friegħi tal-arbuxell tax-xewk u ir-Ragħaj kien jgħaqqad dak iċ-ċirku b’ġismu stess billi jimtedd. U b’hekk kien ikun il-bieb taċ-ċirku. Hu stess b’ħajtu kien jiddefendi lin-nagħaġ tiegħu. Dan hu Ġesu’ li għadu jiddefendina u jħarisna bħala il-Bieb.