Riflessjoni

Fl-Evanġelju tas-Sitt Ħadd tal-Għid, Ġesù jkompli juri l-imħabba illi għandu għad-dixxipli tiegħu fiċ-Ċenaklu. Din hija stedina li Ġesù qiegħed jagħmel lilna wkoll biex nidħlu f’din ir-relazzjoni ta’ imħabba miegħu. Li nħarsu l-kmandamenti ma jfissirx biss li nobduhom imma li ngħixu kemm jista’ jkun kif għex Hu, jiġifieri nkunu għotja għall-oħrajn. Ta’ dan għandna eżempju ċar ta’ Ġesù illi, fuq is-salib, obda sal-mewt mhux minħabba xi kmandament li ġie mpost fuqu imma kienet propju din l-imħabba li ġejja minn Alla li Ġesù ta ħajtu minn rajh. Għalhekk, aħna wkoll mistiedna biex inħobbu f’kull laqgħa, f’kull post, f’kull ċirkustanza. Din l-imħabba lesta li taffronta t-tfixkil u jkollha l-ħila li tiġġedded. Frott din l-imħabba bejn il-Missier u l-Iben, għandna l-Ispirtu s-Santu li hu d-Difensur li se jieqaf magħna sabiex ma nkunu qatt weħidna. Dan l-Ispirtu jtina l-qawwa biex nikbru fil-għerf u jagħtina dak li għandna bżonn biex nagħmlu kollox b’imħabba. Misjuqin minn din l-imħabba, aħna nistgħu nħarsu l-Kmandamenti li bħal mera juruna min aħna u fejn aħna. Flimkien, bħala Knisja, kapaċi nagħmlu l-għażliet li huma tajba skont ir-rieda ta’ Alla.